الدابوز الكذاب

عبد الجبار المنوني العلمي

مكفي على فمي
قبة من لعذاب فضهري
يسالوني على الغيب
وشوفي مسايس
يدهم لفوق
والدبزة ف يد الرايس

.درت جنوي فمي
وعيطت عل عرش بلقيس
والرمشة ف عينو تهضر
لاهوتي هو يأمر :
نمرود قال:
أنا الرب الاكبر
و سيح دمي
قبل ما الرمشة ترجع لبصر

طلبت الشفاعة والتسليم
تقرقب لحديد فلساني ودويت
قال :
المختار سيف الاله أنا
موري ندور فالمكانة
بنيو سوار
على الجماعة
وزممو عقدة
ليكم الشطون
وليا الكاعة
قلت لو :
الشمس مركز
والارض تدور
تهمني بلحماق
ظن فخبالي أرض بور
ونزلات الدبزة عاوتاني
وبقيت مذكور

علقت فقصبتي درة ونعناع
طلعنا فالحومة طوايف
ساطت فينا ريح التخمام
سبق للطاحونة وزرع لخرايف
وعطانا كسدة تقرشل الطعام
وكيرة باردا وفرزية ف الزلايف

زرع فبلاد النخل بارود
وحصد سبول الغاز
سكن عيوط خربوشة
ومرمة الحراز
نور ك بلعمان فحوافر الحركة
ف أنوال وبوغافر ما فاز
تبعني زنكة زنكة
تخبل الربيع ومن حدانا داز

بقيت من دبزة لدبزة
يدو لفوق
ويسولني آش كاين
ويخبط الكسدة
لكن أنا ف نفسي كاين

خليت لو كسدتي المنظورة
وهزيت معايا فكري
خليتها مهجورة
راحل ف سوالي.
واش أنا غير ثقل منجوس ؟
او صورة لعرفي فيا معكوس ؟
مغتارب فحرقة الذات
فين أنا ؟
نسول كوجيتو ديكارت

نزل عاود بالدبزة
ما لقاني فضيق الكسدة
خاف وعيط للشيوخ ومردا

تبعني تحت سطور كتاب
لقاني ساروت نفتح الباب
تبعني فخيوط الشمس والكمرة
لقاني مداد من سبول القمح والذرة

وقف يلهت ريقو تصدا
شافني فسحاب نكتب الما
قال لي نزل نتوالمو بعدا
قلت لو طلع نعاودو القسمة